826. സ്നേഹത്തിന്‍ ഇടയനാം യേശുവേ
1 സ്നേഹത്തിന്‍ ഇടയനാം യേശുവേ
വഴിയും സത്യവും നീ മാത്രമേ
നിത്യമാം ജീവനും ദൈവപുത്രാ!
നീയല്ലാതാരുമില്ല
യേശുനാഥാ! ഞങ്ങള്‍ക്കു നീയല്ലാതാരുമില്ല
യേശു നാഥാ! നീയല്ലാ-താരുമില്ല
2 സാധുക്കള്‍ക്കായ് വലഞ്ഞലഞ്ഞതും
ആടുകള്‍ക്കായ് ജീവന്‍ വെടിഞ്ഞതും
പാടുകള്‍ പെട്ടതും ആര്‍ നായകാ? നീയല്ലാതാരുമില്ല-
3 നീക്കിടുവാന്‍ എല്ലാ പാപത്തെയും
പോക്കിടുവാന്‍ സര്‍വ്വശാപത്തെയും
കോപാഗ്നിയും കെടുത്തിടാന്‍ കര്‍ത്താ! നീയല്ലാതാരുമില്ല-
4 അറിവാന്‍ സ്വര്‍ഗ്ഗപിതാവിനെയും
പ്രാപിപ്പാന്‍ വിശുദ്ധാത്മാവിനെയും
വേറൊരു വഴിയുമില്ല നാഥാ നീയല്ലാതാരുമില്ല-
5 സഹിപ്പാന്‍ എന്‍ബുദ്ധിഹീനതയും
വഹിപ്പാന്‍ എന്‍എല്ലാ ക്ഷീണതയും
ലാളിപ്പാന്‍ പാലിപ്പാന്‍ ദൈവപുത്രാ! നീയല്ലാതാരുമില്ല
6 സത്യവിശ്വാസത്തെ കാത്തിടുവാന്‍
നിത്യം നിന്‍ കീര്‍ത്തിയെ പാടിടുവാന്‍
ഭൃത്യന്മാരില്‍ കൃപ തന്നിടുക നീയല്ലാതാരുമില്ല-
7 ദൈവമഹത്ത്വത്തില്‍ താന്‍ വരുമ്പോള്‍
ജീവകിരീടത്തെ താന്‍ തരുമ്പോള്‍
അപ്പൊഴും ഞങ്ങള്‍ പാടിടും നാഥാ! നീയല്ലാതാരുമില്ല-
Download pdf