926. ദൈവദ്വേഷിയായ് തീരുകിലതിന്‍ ഫലം മറക്കാമോ?
ദൈവ ദൈവദ്വേഷി-ദൈവത്തെ ഇഷ്ടപ്പെടാത്തവന്‍. തം-അവനോട്‌. പ്രതിവാദം എതിര്‍വാദം. നിജതാതന്‍-തന്റെ പിതാവ്‌. മോദം-സന്തോഷം. നാദം-ശബ്ദം (വചനം). തൃജിക്കുക-ഉപേക്ഷിക്കുക. തവ-നിന്റെ. രതി-ആഗ്രഹം. മതി-ബുദ്ധി. ഗതി-പോക്ക്‌. സാദം-ക്ഷീണം. വാനം-ആകാശം. ഇദം ഉരവരും-ഇപ്രകാരം പേരു വരുന്ന. മാനിനി-സ്ത്രീ. നിജഹിതം-സ്വന്തം ഇഷ്ടം. തദവസരേ-ആ അവസര ത്തില്‍. തെരിഞ്ഞാന്‍-അറിഞ്ഞു. വിരവൊടു-പെട്ടെന്ന്‌. പാവനം-പരിശുദ്ധം. സംഘം-കൂട്ടം. ഉയിര്‍-ജീവന്‍.
ദൈവത്തെ ദ്വേഷിക്കുന്നവർക്ക് അതിന്റെ ഫലം മറക്കാന്‍ സാധ്യമല്ല, ശിക്ഷാവിധി കുറയ്ക്കാനും പറ്റുകയില്ല. ഭൂമിയിലുള്ള ആര്‍ക്കെങ്കിലും ദൈവത്തോടു പ്രതിവാദം ചെയ്യുവാന്‍ സാധിക്കുമോ.
കര്‍ത്താവ്‌ ലേകാരംഭം മുതലെ പിതാവായ ദൈവത്തോടൊത്ത്‌ പറഞ്ഞ വചനം നാം ആദരിക്കുകയും സ്വീകരിക്കുകയും ചെയ്യേണ്ടതാണ്‌. അതു പലപ്പോഴും നീ കേട്ടിരിക്കാം, ചിലപ്പോള്‍ വിട്ടുകളഞ്ഞിരിക്കാം, സ്വീകരിച്ച ഭാവം നടിച്ചിരിക്കാം, ഒരുപക്ഷെ നല്ലതെന്ന് കരുതിയിരിക്കാം. എന്നാല്‍ നീ സ്വീകരിച്ചാല്‍ അത് ഗുണമാണ്‌. രക്ഷയ്ക്ക്‌ അതു മതിയാകും. ചതിവുകാണിച്ചാലോ അവന്‍ നിന്നെ തൃജിക്കുമെന്നു മനസ്സിലാക്കുക. നിന്റെ തീരുമാനവും, ആഗ്രഹവും, ബുദ്ധിയും, പോക്കും ദൈവമുമ്പാകെ അടിപെട്ടു പോകുമെന്നത്‌ ശരിയാണ്‌.
ഏദനു തുല്യമായിരുന്ന സോദോം നഗരം വളരെ നല്ലതെന്നു കണ്ട്‌ ജനം അതില്‍ പ്രവേശിച്ച്‌ യാതൊരു പ്രയാസവും കൂടാതെ ജീവിച്ചപ്പോള്‍ അവർ ദൈവത്തെ മറന്ന്‌ ദോഷം പ്രവര്‍ത്തിച്ചു വഷളന്മാരായിത്തീര്‍ന്നു. ദൈവം ആകാശം തുറന്ന്‌ അഗ്നിയും ഗന്ധകവും വര്‍ഷിപ്പിച്ച്‌ അവരെയെല്ലാം ദഹിപ്പിച്ചു. കരിയാണോ, കരയാണോ, തിരയാണോ, ഇതിൽ ഏതെന്നറിയാത്ത ഒരു കടല്‍ അവിടെ ഉണ്ടായി.
മനുഷ്യരുടെ സൌന്ദര്യവതികളായ യുവതികളെ കണ്ട്‌ അവരില്‍ ആഗ്രഹം ജനിച്ച ദൈവപുത്രന്മാരുടെ സ്വഭാവം ഗ്രഹിച്ച ദൈവം അവരുടെ മേല്‍ ജലപ്രളയം അയച്ചു. ഘോരമാരി അവരുടെ സാമര്‍ത്ഥൃത്തെ തടുത്തു കളഞ്ഞു (കടു മഴ വിടര്‍ത്തിടാതെ അടുത്തു തടുത്തവര്‍ പടുത്വവും) അവരുടെ വസ്തുവകകളും സൌന്ദര്യവും ശക്തിയും കുലവും എല്ലാം പ്രളയജലത്തില്‍ ആഴ്ത്തിക്കളഞ്ഞു.
ലേവീപുത്തന്മാരായ കോരഹ്‌, ദാതാന്‍, അബീരാം എന്നിവര്‍ ദൈവഹിതം മാനിക്കാതെ പരിശുദ്ധ പുരോഹിതസ്ഥാനത്തെ എതിര്‍ത്തതുകൊണ്ട്‌ ദൈവം കോപിച്ചു. ഭൂമി വായ്‌ പിളര്‍ന്ന്‌ അവരെ വിഴുങ്ങിക്കളഞ്ഞു. അവര്‍ ജീവനോടു ഭൂമിക്കടിയിലേക്കു സകല വസ്തുവകയോടുംകൂടി താഴ്ത്തപ്പെട്ടു.
Download pdf